ఏఐ గ్లాసెస్‌తో పరీక్ష.. దక్షిణ కొరియాలో హైటెక్ చీటింగ్

దక్షిణ కొరియాలో ఆర్టిఫిషియల్ ఇంటెలిజెన్స్ (ఏఐ) టెక్నాలజీని ఉపయోగించి పరీక్షలో చీటింగ్ చేస్తున్న ఇద్దరు వ్యక్తులు పట్టుబడ్డారు. మే 10, 31 తేదీల్లో జరిగిన టోయిక్ ఇంగ్లీష్ లాంగ్వేజ్ ప్రొఫిషియన్సీ టెస్టులో ఈ ఘటనలు చోటుచేసుకున్నాయి. అనుమానాస్పదంగా కనిపించిన వీరిని పరీక్షా నిర్వాహకులు తనిఖీ చేయగా, వారు ఏఐ గ్లాసెస్ ధరించినట్లు గుర్తించారు. ఈ తరహా మోసం వెలుగు చూడటం ఇదే మొదటిసారి అని కొరియా టోయిక్ కమిటీ బుధవారం తెలిపింది.

పట్టుబడిన ఇద్దరి పరీక్ష ఫలితాలను రద్దు చేయడంతో పాటు, వారిపై నాలుగేళ్ల పాటు పరీక్ష రాయకుండా నిషేధం విధించినట్లు కమిటీ ప్రకటించింది. ఏఐ గ్లాసెస్... కెమెరాలు, మైక్రోఫోన్‌లతో పనిచేస్తాయి. ఇవి సాధారణ కళ్లజోడులాగే ఉండటంతో వీటిని గుర్తించడం కష్టం. ఈ నేపథ్యంలో, భవిష్యత్తులో ఇలాంటి మోసాలను అరికట్టేందుకు పరీక్షా కేంద్రాల్లోని సిబ్బందికి ప్రత్యేక శిక్షణ ఇస్తున్నట్లు కమిటీ పేర్కొంది.

ఇదిలావుండగా, మరోవైపు ఏఐ టెక్నాలజీ అభివృద్ధి కోసం భారీ పెట్టుబడులు పెట్టేందుకు టెలికాం దిగ్గజాలు ముందుకు వస్తున్నాయి. దక్షిణ కొరియాకు చెందిన ఎస్‌కే టెలికాం, జపాన్‌కు చెందిన ఎన్‌టీటీ, తైవాన్‌కు చెందిన చుంగ్వా టెలికాం కంపెనీలు కలిసి ఒక జాయింట్ ఫండ్ ఏర్పాటు చేస్తున్నాయి. ఈ మూడు సంస్థలు కలిసి సుమారు 500 మిలియన్ డాలర్ల నిధితో 'కాటలైట్ క్యాపిటల్' అనే సంస్థను ఏర్పాటు చేయనున్నాయి. ఏఐ చిప్స్, కూలింగ్ సిస్టమ్స్ వంటి రంగాల్లోని స్టార్టప్‌లలో ఈ నిధులను పెట్టుబడిగా పెట్టనున్నారు. ఈ ఫండ్‌లో చిప్ తయారీ దిగ్గజం ఎస్‌కే హైనిక్స్ కూడా పాల్గొనే అవకాశం ఉంది.